Dende MOVENEDA queremos trasladar a nosa máis sincera felicitación ás nais e pais do alumnado afectado pola situación do 2º curso de Primaria do CEIP de Maciñeira.

A Inspección Educativa trasladou á concesión dunha nova praza docente para facer posible o desdobre da aula no próximo curso. Isto é unha excelente noticia e, sobre todo, unha vitoria das familias que decidiron organizarse, mobilizarse e defender con determinación os dereitos dos seus fillos e fillas.

Se a solución acaba confirmándose oficialmente, será grazas á presión exercida polas familias, ao apoio recibido por parte da comunidade educativa e á repercusión pública que acadou esta reivindicación plenamente xusta. Unha vez máis demóstrase que cando a cidadanía se organiza e fai oír a súa voz, as administracións vense obrigadas a rectificar.

HAI QUE PERMANECER VIXIANTES

Con todo, consideramos prematuro dar o asunto por pechado. Mentres non exista comunicación oficial por escrito que confirme definitivamente a concesión da praza, compartimos a postura da AMPA de manterse vixiantes ata que a decisión sexa firme e efectiva.

A experiencia acumulada coa Xunta de Galicia obríga a actuar sempre con prudencia: Ata que os compromisos non estean formalizados e garantidos, non cabe baixar a garda.

O CONCELLO, OPACIDADE E AUTORITARISMO

Por outra banda, queremos denunciar a actitude do goberno de Neda durante todo este proceso.

En primeiro lugar, o alcalde ignorou completamente a solicitude de MOVENEDA para convocar con carácter urxente a Xunta de Portavoces. Ese órgano é un dos indicados para consensuar unha resposta institucional unitaria en defensa da comunidade educativa. Nin se convocou a reunión nin sequera se obtivo resposta á petición realizada.

En segundo lugar, o alcalde tampouco informou aos grupos da oposición das xestións que afirma ter realizado ante a Consellería de Educación. Non trasladou información sobre os contactos mantidos nin se facilitou copia do escrito que di ter remitido á administración autonómica.

Esta forma de actuar evidencia un xeito de entender a institución da alcaldia baseada na opacidade e na falta de participación.

10 ANOS SEN CONSELLO ESCOLAR MUNICIPAL

Por outra banda, resultanos sorprendente que no comunicado difundido polo Concello, este fale do “Consello Escolar”. Desde MOVENEDA aproveitamos para recordar que o Consello Escolar Municipal leva aproximadamente unha década sen constituírse nin convocarse, privando á comunidade educativa local dunha ferramenta fundamental de participación.

PARABÉNS A AMPA

Hoxe é momento de felicitar ás familias pola súa loita e polo resultado acadado, pero tamén para reivindicar institucións máis transparentes, máis participativas.

MOVENEDA seguirá a defender unha educación pública de calidade para Neda e continuará esixindo tanto á Xunta de Galicia como ao goberno municipal a máxima transparencia e responsabilidade nos asuntos que afectan ao futuro dos nosos nenos e nenas