Os Bombeiros de Ferrol convocan á cidadanía a unha concentración o vindeiro 26 de febreiro, ás 18.00 horas na Praza de Armas, baixo o lema “Todos somos Polo”, en apoio ao compañeiro gravemente ferido no incendio rexistrado esta semana no barrio de Recimil, no que tivo que serlle amputada unha perna.

CONVOCAN UNHA CONCENTRACIÓN EN APOIO AO COMPAÑEIRO E PARA RECLAMAR MÁIS RECURSOS

A convocatoria prodúcese nun contexto de forte solidariedade social e profesional, con múltiples mostras de apoio chegadas desde outros parques de bombeiros, colectivos e veciñanza, así como reivindicacións que reclaman melloras no servizo e máis recursos para garantir a seguridade dos efectivos.

O suceso produciuse mentres o corpo de bombeiros xa se atopaba nun período de protestas pola falla de persoal e medios, unha situación que os profesionais levan tempo denunciando e que volveu poñerse no centro do debate tras este grave accidente.

Ó longo destes días, as redes sociais foron enchéronse de mostras de ánimo de numerosos corpos de bombeiros de diferentes cidades e localidades veciñas, de particulares e das reaccións de grupos políticos e sindicatos que reclaman ao executivo local, encabezado por Rey Varela, unha investigación completa e as medidas oportunas, ademais de desexar unha pronta recuperación ás persoas feridas.

PETICIÓNS DE DIMISIÓNS

Nas últimas horas xurdiron diversas voces esixinto a asunción de responsabilidades e dimisións. Así, a sección sindical da CIG no Concello de Ferrol solicitaba a intervención da Inspección de Traballo e a súa participación nas pescudas. A CIG esixe a dimisión do alcalde Rey Varela e das concelleiras de Recursos Humanos e Seguridade, Susana Sanjurjo e Pamen Pieltain, ademais da renuncia do coordinador de seguridade e do xefe de Bombeiros.

Pola súa banda, o Comité Comarcal do PCG emitiu un duro comunicado xunto ó PCE(ml) onde acusan ó goberno de Rey Varela de botar anos deteriorando os servizos públicos mediante orzamentos insuficientes, falla de persoal e ausencia de investimentos estruturais. Responsabilizan ó alcalde e o seu equipo da situación de recortes, ataques e decisións neglixentes. Esixen a dimisión inmediata do alcalde pola súa "manifesta incompetencia", pola súa incapacidade para garantir condicións seguras e pola súa "neglixencia política, que roza o criminal cando o resultado é unha amputación, un dano irreversible, de por vida, para un traballador".

A MULLER DO BOMBEIRO FERIDO ACUSA ó GOBERNO LOCAL DE “NEGLIXENCIA POLÍTICA”

A muller do bombeiro ferido grave no incendio de Recimil, en Ferrol, denunciou publicamente a falta de persoal e medios no servizo e acusou ao goberno municipal de “neglixencia política”. Segundo afirma, a intervención realizouse con efectivos insuficientes tras unha noite de múltiples incidencias polo temporal. 

A muller rebate a versión municipal sobre a atención prestada e asegura que non precisa políticos que se presenten no hospital "para facer o paripé", senón vontade para solucionar as carencias que o colectivo arrastra desde hai anos.

Denuncia que persoalmente non recibiu chamada ningunha do concello e que a do xefe de bombeiros chegou "nin sequera a tempo", lamentando que este último non considerase oportuno avisala do sucedido na madrugada do xoves.