Fracaso absoluto. Así calificamos dende Moveneda á campaña Merca na vila, unha iniciativa da Deputación da Coruña en colaboración coa Federación Galega de Comercio. En teoría, forma parte dunha "estratexia da Deputación para apoiar ao pequeno comercio e fortalecer este sector nos concellos de menor poboación".

Fracaso en Neda

O máis destacado é a baixísima repercusión nos comercios de Neda, con tan só tres establecimentos adheridos. Isto da boa medida de dúas cousas:

• O escaso interés que despertou a iniciativa entre os comerciantes locais
• O escaso traballo feito polo goberno do concello para promocionar unha campaña da "Deputación amiga"
• Estamos ante unha campaña pouco axeitada ás características de Neda

Unha campaña pouco axeitada para Neda

A campaña está pensada para entornos máis urbanos, máis densos, con barrios comerciais e rangos de poboación máis novos. Outra clave é que a campaña realmente promove dar ainda máis beneficios á banca, posto que só contempla o pago electrónico.

Esta é unha campaña complexa, onde os veciños deben darse de alta nun sistema dixital, cousa que non é doada para tpodo o mundo.

Por outra banda, o comercio de barrio perde o control sobre os pagos e recibe menos cartos polas súas vendas. No que tradicionalmente no negocio de barrio era unha transacción bilateral cliente-tenda, agora pasa a ter a presencia interposta de entidades como bancos e Deputación.

Falando da Deputación, esta última, non ten moi boa sona entre os pequenos comercios, polos líos e esixencias de devolucóns que está a esixir a algúns negocios e autónomos que pediron axudas polo COVID.

Por qué fracasa unha campaña así?

É evidente que pesa moito o estado dos negocios en Neda, moi afectados pola baixada de poboación, o escaso apoio institucional, as subas xeralizadas de prezos e a merma xeralizada de poder adquisitivo da poboación nos últimos tempos.

Esta campaña non dinamiza a actividade comercial nun concello como Neda, onde temos unha alta taxa de poboación de idade avanzada que non usa medios electrónicos de pago. Non é certo que promovan as compras de proximidade nin incentiva o consumo.

Esta é unha campaña para ir guiando, pouco a pouco á xente cara ós pagos electrónicos e desbotar o pago en metálico.