Na última reunión da Comisión de Área de Turismo, dende MOVENEDA presentamos unha proposta clara, viable e pensada para mellorar a imaxe de Neda ante os que nos visitan: habilitar unha Oficina de Turismo Permanente nun emprazamento estratéxico.

En concreto, propuxemos concelleira María Ángeles Bello Salazar que o Concello podería crear unha Oficina Permanente de Turismo na planta baixa da estación de tren de Neda.

Trátase dun lugar privilexiado: próximo ao Camiño de Santiago, con fácil acceso para peregrinos, con grande espazo para estacionamento de todo tipo de vehículos (como autocaravanas) que nos visiten e cun enorme potencial como punto de acollida e información para visitantes. Pensamos que é unha proposta realista, útil e perfectamente asumible.

Esta non é unha idea pechada, está pensada para abrir o debate, sumar ideas e traballar en conxunto para millorar o concello.

NEGATIVA ROTUNDA. NIN DEBATER A PROPOSTA

A resposta da concelleira foi clara e inmediata: negativa rotunda, que "no lo ve".

Sen estudo, sen análise e, o máis preocupante, sen vontade de debate. Un “non” baseado unicamente no seu criterio persoal, pechando a porta a calquera diálogo sobre iniciativas que podidan beneficiar ao conxunto da veciñanza.

UN GOBERNO SEN IDEAS E SEN VONTADE DE ESCOITAR

Este é o problema de fondo no Concello de Neda: Padecemos un goberno sen ideas, que tampouco quere escoitar as dos demais, que rexeita o debate, que ignora sistematicamente á oposición e que desaproveita oportunidades por non aceptar propostas que non nacen do seu propio círculo.

ASÍ É IMPOSIBLE AVANZAR

Dende MOVENEDA seguiremos facendo o noso traballo: propoñer, construír e defender alternativas para mellorar Neda. Pero tamén seguiremos denunciando esta forma de gobernar pechada, esgotada e allea á colaboración que necesita a Neda do futuro. Porque en Neda merecemos máis.