A concelleira Neiva Tristão presenta unha proposta para equiparar a Neda con centos de concellos de toda España

MOVENEDA presentou este venres unha moción para modificar a Ordenanza Fiscal do Imposto sobre Vehículos de Tracción Mecánica (IVTM) e introducir bonificacións de ata o 75% da cota para os vehículos eléctricos, híbridos enchufables e de gas domiciliados no municipio.

A proposta encaixa no artigo 95.6 da Lei Reguladora das Facendas Locais, que habilita ós concellos a establecer estas bonificacións. Non se trata de ningunha iniciativa excéntrica: centos de municipios de toda España xa as aplican.

COHERENCIA POLITICA

A moción tamén apunta a un argumento de coherencia política: o propio partido do alcalde Ángel Alvariño, o PSOE, aplica estas bonificacións nos concellos que goberna en toda España.

Rexeitala en Neda suporía ir en contra da liña do seu propio partido e das políticas enerxéticas e medioambientais da Unión Europea e do Goberno de España.

QUE PROPÓN A MOCIÓN?

• 75% de bonificación do IVTM para vehículos con distintivo ambiental CERO (eléctricos puros, pila de combustible) de forma indefinida.
• 75% durante 6 anos para híbridos enchufables e vehículos de gas con distintivo ECO.
• Campaña de difusión e publicidade municipal para informar a toda a veciñanza.

MOVENEDA insta ao goberno municipal a aprobar inmediatamente esta medida no próximo pleno e recorda que o transporte representa preto do 25% das emisións de CO₂ en España. 

Neda ten a obriga de sumarse ás mellores prácticas para incentivar a mobilidade sostible entre a súa veciñanza.