DECLARACIÓN DE MOVENEDA

Ultimamente hai algúns elementos moi activos que operan nas redes sociais desde perfís anónimos.

Hoxe, dende un deses medios agochados no anonimato se acusa ós compañeiros do BNG de copiarnos o noso lema "En Neda merecemos máis"

Dende MoveNeda non temos ningún problema con esta coincidencia. Ó contrario: é un halago que unha organización con tantos recursos e ben asesorada como o BNG, chegue ás mesmas conclusións e ideas que un modesto movemento veciñal.

Por outra banda, hai uns días tamén outro deses operadores anónimos insinuaron a idoneidade de certas "confluencias".

Distancia sideral co Partido Popular

Queremos deixar claro que a distancia que nos separa do Partido Popular é enorme, sideral: Nós defendemos os servizos públicos, ben financiados, ben xestionados e de calidade. O PP defende o contrario: pretende privatizar todo e, mentres non consegue regalar todo ós seus amigos ricos, recorta presupostos, precariza e degrada os servizos públicos como a sanidade e a educación e os considera campo onde poden facer negocio os seus amiguetes. Por exemplo: Hai ben pouco o grupo dos Populares de Neda votou en contra dunha moción en defensa da Sanidade Pública.

Por outra parte, tamén nos diferencia o xeito de facer as cousas. Nós cremos no traballo constante, en equipos consolidados que xa teñen demostrado o seu compromiso polos asuntos deste concello e os problemas dos seus conveciños. Non non creemos en paracaidistas, fichaxes estelares nin naqueles que pensa quen un Concello e como dirixir unha empresa.

Movenda nunca rexeita nin fuxe do debate

Dito isto, dende Moveneda estamos dispostos, e así o levanos reclamando dende hai 8 anos, a falar e debater con grupos políticos, asociacións, entidades, veciños e veciñas de xeito individual... con todos e de calquera asunto que afecte ó noso concello. E sempre coa esperanza de chegar a algún acordo con vontade de perdurar no tempo, que sexa beneficioso, como ben merecemos toda a veciñanza de Neda.

Novamente, aproveitamos para rexeitar estes intentos de influír na vida do Concello e este xeito de facer política, sembrando cizaña dende o anonimato.

En Neda merecemos luz, taquígrafos e, sobre todo transparencia.

En Neda merecemos máis!