Dende o Movemento Veciñal Neda - MOVENEDA queremos expresar a nosa máis fonda solidariedade e todo o noso apoio ó Corpo de Bombeiros de Ferrol, e de maneira moi especial ó seu compañeiro recentemente accidentado, que sufriu a amputación dunha perna cumprindo co seu deber de auxiliar a poboación.

Queremos facer chegar o noso agarimo, respecto e desexo de recuperación na millor das condicións posibles, así como o recoñecemento ó seu compromiso exemplar co servizo á cidadanía.

Os bombeiros son exemplo permanente de xenerosidade, esforzo, valentía e entrega sen límites ó servizo público, arriscando a súa propia vida para protexer á veciñanza. A súa laboura é absolutamente imprescindible e merece o apoio firme e decidido de todos.

OS BOMBEIROS, SERVIZO A PESARES DA PRECARIEDADE

O grave accidente de ontes pon de manifesto unha realidade que non pode seguir sendo ignorada. Cando os gobernos municipais non asumen plenamente as súas responsabilidades, cando se recorta, se privatiza ou se somete aos servizos públicos a unha infrafinanciación crónica, as consecuencias recaen directamente sobre os traballadores e sobre a seguridade colectiva.

As carencias de equipamento, dotacións e persoal que padece o servizo de bombeiros de Ferrol son o resultado dun proceso acumulado de degradación progresiva, de decisións políticas que non situaron como prioridade a seguridade, a prevención e o reforzo dos servizos públicos esenciais.

POR UNS SERVIZOS PUBLICOS DIGNOS, DE CALIDADE

Dende MOVENEDA queremos trasladar todo o noso recoñecemento e gratitude aos bombeiros, e reafirmamos o noso compromiso coa defensa duns servizos públicos dignos, ben dotados e plenamente preparados para garantir a seguridade e o benestar da nosa veciñanza.