A mobilización e as protestas tras o grave accidente en Recimil obrigan a rectificar ao goberno de Ferrol: aprobada a maior oferta de emprego público da súa historia

O Concello de Ferrol aprobou unha Oferta Pública de Emprego (OPE) de 97 prazas, a maior da súa historia, incluíndo novas incorporacións en servizos clave como bombeiros, Servizos Sociais e Policía Local. A medida reforzará unha plantilla municipal que leva anos sofrindo falta de persoal e deterioro do servizo público.

Como novidades relevantes, o reforzo do servizo de bombeiros e a mellora dos Servizos Sociais, que por primeira vez cubrirán todos os postos previstos e incorporarán novas figuras profesionais.

O PP MOVESE CANDO LLES ARREAN

Este avance non é froito da casualidade nin vontade espontánea do goberno do PP. É consecuencia directa das protestas e mobilizacións do persoal e das organizacións sindicais, que levan anos denunciando as políticas de recortes e precarización.

Resulta especialmente grave que tivera que producirse unha traxedia con mortos e feridos graves no recente incendio para que o goberno de José Manuel Rey Varela e o PP rectifiquen, abandonen a súa política de recortes salvaxes e se vexan obrigados a reforzar servizos como os bombeiros. A rectificación evidencia que as criminais políticas de precarización do Partido Popular (e os seus socios de Vox) afectan á seguridade de todos.

A ORGANIZACION E A LOITA DAN FROITOS

Fronte ós discursos que din que organizarse non serve de nada, a realidade demostra o contrario: a loita colectiva consegue resultados concretos.

Desde MOVENEDA reiteramos que con organización, mobilización e presión social se poden defender os servizos públicos e tamén conseguir avances en concellos como Neda, que padece dende hai anos un goberno inmovilista, sen ideas nin propostas.

Os avances conquístanse, non se conceden.