A Xunta de Galicia informa mediante nota da visita da delegada territorial de Ferrol, Martina Aneiros, e o director de Augas de Galicia, Roi Fernández, visitaron esta mañá a zona onde se están a acometer os traballos

A nota di o seguinte:

"A Xunta, a través de Augas de Galicia, iniciou estes días a terceira fase dos traballos de conservación e mantemento que está a executar nun tramo cualificado como área de risco potencial significativo de inundación (ARPSI) do río Belelle, ao seu paso polo municipio de Neda. A delegada territorial de Ferrol, Martina Aneiros, e o director do organismo hidráulico, Roi Fernández, visitaron esta mañá a zona na que se están a acometer os traballos e a onde tamén se desprazaron o alcalde da localidade, Ángel Alvariño, e veciños.

A intervención, cun investimento de máis de 40.000 euros, inclúe a construción dunha coieira de 50 metros na marxe esquerda dunha das represas existentes no río.

En total, incluídos estes traballos, Augas de Galicia leva investidos desde decembro do ano pasado máis de 150.000 euros en actuacións de conservación fluvial no río Belelle. Así a delegada territorial lembrou que en fases anteriores elimináronse 1.067 m3 de sedimentos nun tramo de 200 metros, no lugar de Camiño da Ponte Grande, co que se logrou incrementar a capacidade hidráulica nese punto do río e se eliminaron as estruturas de dúas represas existentes, así como un muro vertical de formigón de 50 metros.

Aneiros insistiu na importancia destes traballos en tanto “permiten acadar unha xestión máis eficiente do caudal do río Belelle en episodios de choiva intensa e protexer así as infraestruturas máis próximas, sobre todo as vivendas, evitando episodios como o acontecido hai dous anos”, indicou.

Estas actuacións execútanse no marco do programa de mantemento, conservación e mellora do dominio público hidráulico da conca Galicia-Costa e nas súas zonas de acceso e protección, cuxo obxectivo é mellorar os leitos fluviais para favorecer as condicións naturais do ecosistema dos ríos, actuando nas áreas nas que a Xunta ten competencias, fóra das tramas urbanas fluviais que son de responsabilidade municipal."